《石垣島首位香港地勤：沖繩偏遠小島奮鬥記》第五章：廣東話、登機手續與文化趣事——2018年5月

做咗一個月嘅 check-in 員工之後，工作終於開始上手。無論係行李處理、協助乘客 check in，定係管理登機流程，我嘅技巧逐漸提升。美奈小姐話我可以喺櫃位講廣東話，但提醒我要小心啲：如果我用廣東話，佢就唔知我係咪講緊啱嘅內容，叫我謹慎啲。

一開始我通常都會用英文同乘客講嘢，但如果佢哋需要多啲指引，我就會轉去講廣東話。有時我見到啲內地乘客，直接用普通話同日本職員講，好似假設咗所有人都聽得懂咁，睇到真係覺得有啲奇怪，唔知佢哋係咪以為普通話係全球通用嘅呢！

有趣嘅係，我經常見到啲持香港護照嘅旅客居然唔識講廣東話，老實講，心裏面有啲失望。雖然呢種感覺我只係埋喺心入面，但我覺得，識講少少廣東話係對香港嘅一種尊重。不過，香港英文都係官方語言之一。

隨住我 check-in 嘅技術提升，日本同事開始放心俾多啲工作我，流程亦都變得順暢。喺石垣機場，香港航班嘅 check-in 櫃位會喺早上 9:15 開，10:45 關。臨近截關前，我通常會去到入境區協助乘客，我會用廣東話提醒乘客填寫入境地址表格，方便過關。或者去登機閘口幫手登機。

由於石垣島每日只有一班飛香港嘅航班，漸漸有啲乘客開始認得我，每次見到我都會打聲招呼。當時我真係無諗過，幾年後，呢班熟面口嘅人居然會搵我教佢哋啲仔女學英文同日文。

每次航班喺 11:45 起飛之後，我啲同事通常會圍埋嚟，八卦咁問我香港嘅野。我好似成為咗非正式嘅「石垣機場香港大使」，解答佢哋對香港護照嘅疑惑——好似 BNO、香港特區護照，甚至係加拿大護照。佢哋仲會問我有關「一國兩制」嘅問題，甚至想問我香港旅遊小貼士。連入境同海關嘅職員都會過嚟傾幾句，令我每日工作增添唔少趣味。