第二章：日本最細嘅國際機場——2018年4月

第二章：日本最細嘅國際機場——2018年4月

4月1日，派遣公司嘅老細竹野先生帶我喺機場四圍行，介紹咗啲同事俾我識，又開始我第一日嘅「On-the-Job Training」(OJT)。我被派去嘅地勤公司主要負責香港航班，我心諗，識得三種語言嘅我真係啱啱好適合呢份工！但係，當我第一次見到機場嘅時候……天呀！真係未諗過一個國際機場可以咁細！呢度嘅面積大概只係等於4間普通日本屋咁大。

日本有29個國際機場，但我敢講石垣島嘅一定係最細嘅。入到去，首先見到四個check-in櫃位，旁邊就係baggage check area。再行入少少，就係身體檢查同埋出境護照檢查，係由日本出入境負責。登機室就更加迷你——冇商店，得啲洗手間同一部自動販賣機陪你等飛機。沒有登機橋，乘客要喺跑道行過去先可以上機。至於行李處理？呢度冇乜自動分流系統，全部人手做嘅。

雖然機場咁細，但有一種特別嘅溫馨感，大機場真係比唔上。我開始鍾意呢度喇。竹野先生介紹咗我嘅主管美奈小姐（Mina-san），佢負責訓練我。美奈小姐嘅英文流利，亦幫我介紹咗其他團隊成員俾我識。我好快就發現，美奈小姐會係我喺石垣島生活中嘅重要人物，呢啲我遲啲再講。

第一日，美奈小姐叫我站喺櫃位後面，觀察同事點樣做嘢。我真係鬆一口氣——我仲以為佢哋會即刻叫我直接上場做check-in(現實上要train兩個禮拜，先可以正式開始)嗰日櫃位有四位日本同事，當中三位只識得基本英文，平時一般check-in都冇問題，但如果遇到顧客投訴或者有特別問題，就明顯見到佢哋嘅英文唔係咁夠。呢時候，美奈小姐就會上前，好靈活咁處理所有問題。

仲有一位叫作佐久川先生（Sakugawa-san），佢係機場嘅負責load control 嘅老行尊，喺航空界有20年經驗, 但佢英文係零，所以Operation嘅時候，經常要美奈小姐幫手。我當時諗住係觀察全隊點做嘢，結果反而係睇住美奈小姐幾乎包辦所有嘢——從check-in、登機閘管理、同機組人員甚至入境/海關溝通，全部都係佢搞。美奈小姐唔只係Supervisor，更係成個運作嘅靈魂人物，如果冇佢，石垣島機場沒有可能運作。

放工之後，我同美奈小姐傾偈，意外發現原來佢都唔係全職員工。佢都係派遣公司OTC派過嚟嘅。原來呢間地勤公司係靠兩間派遣公司嚟支撐整個運作，除咗佐久川先生係全職員工，其他員工全部都係part-time嘅。喺日本，正社員（全職員工）享有工作保障、社會保險同埋花紅，但竟然只係得兩位正社員負責國際航班，真係有啲震驚。

美奈小姐係我石垣島最尊敬嘅人。雖然佢只係第三年喺航空業，但基本上係撐起成個機場，仲有station manager 嘅職銜。佢投入大量私人時間去將英文Manual翻譯做日文，同Train所有新同事。一方面，我佩服佢對航空業嘅熱誠，但另一方面，我開始厭惡公司對佢嘅剝削。在日本，呢啲公司被稱為「黑公司」（ブラック企業）——剝削員工嘅企業。

我對石垣島嘅第一印象好複雜。對工作環境有啲擔心，但同時亦好開心識到咁好嘅前輩。我的石垣冒險真正開始喇。