《石垣島首位香港地勤：沖繩偏遠小島奮鬥記》第九章：出軌之島—石垣島？——2018年7月

第九章：出軌之島—石垣島？——2018年7月

喺日本，已婚人士之間出軌其實幾普遍，根據唔同調查，婚外情行為遠比我哋想像中常見。

• 相模橡膠工業2018年嘅調查：喺14,100位20至60歲嘅受訪者中，大約有26.5%嘅已婚男性同15.2%嘅已婚女性承認曾經有過婚外情。

• RCL偵探事務所2021年嘅調查：針對40至50歲已婚人士，有20.3%男性同13.9%女性坦承出軌。

• 日本性調查2020年：喺6,651位受訪者中，46.7%嘅已婚男性同15.1%嘅已婚女性表示發生過婚外情。

• 
  

事實上，真實數字可能仲高，特別係女性喺調查中唔一定會講實情。石垣島嘅本地人甚至會戲稱呢度係「婚外情之島」。因為島上生活節奏慢、娛樂選擇少，唔少人會透過識新朋友，甚至「越界」嚟搵刺激。我見過有同事或朋友飲醉後，當晚就同識咗冇耐嘅人發生關係，第二日當乜都冇發生過。

其中一位前同事，綾子（化名），就係一個例子。佢每星期兩次會嚟機場交文件，有時放工會載我出去食午飯，順便講吓啲島上八卦。綾子大約44歲，有一仔一女，老公長期喺沖繩各地出差，屋企基本上係佢一個人打理，表面睇落係個模範太太兼母親，生活好有條理。

但有一晚我哋喺居酒屋食飯，佢同我講咗一個秘密——原來佢有婚外情。對象係一個大佢十年、住喺東京嘅男人。佢哋係做義工時識嘅，對方有老婆同女。綾子話，其實佢有內疚感，亦曾經想分手，但對方唔想放手，反而話想繼續保持「特別嘅關係」——每隔幾個月就會飛嚟石垣見面，每次都會發生關係。

佢仲話對方每日朝早都會 send message 俾佢，話早晨，但佢其實覺得好煩。呢段感情唔係佢第一次婚外情，喺呢個男人之前，佢曾經同一位石垣島嘅小學老師交往，但嗰位老師喺2017年過身之後，佢哋嘅關係就告一段落。

我冇對綾子作出咩評論，只係叫佢小心啲，因為石垣島好細，成日俾人撞到。如果真係想分手，直接 block 咗佢 Line 就最快。

佢最後有冇分手，我就冇再追問。綾子喺九月辭職，之後我再冇見過佢。

日本女性好多時好叻隱藏佢哋嘅婚外情。我識過啲朋友，結婚之後同另一個男人拍拖十幾年，佢老公都唔知道。有啲日本女性甚至會同老公講：「如果你真係要出軌，千祈唔好俾我知道，記住準時比家用就得啦。」