《石垣島首位香港地勤：沖繩偏遠小島奮鬥記》第八章：我的首個沖繩夏天——2018年7月

第八章：我的首個沖繩夏天——2018年7月

如果你睇過日劇《海灘男孩》，應該會記得反町隆史飾演嘅角色講過佢要搵到屬於自己嘅「海洋」。對我嚟講，石垣島嘅大海可能就係我嘅「海洋」。住喺海邊嘅感覺好奇妙，知道自己只需行大約十分鐘就可以見到無邊無際嘅藍色海洋，心裡總會有一種平靜。同石垣島嘅大海相伴嘅第一年，我甚至有一刻諗過，想永遠留喺呢度，就為咗呢片美麗嘅海洋。

石垣島嘅本地人經常講：「大海係用嚟欣賞嘅，而唔係用嚟游水嘅。」所以，你經常會見到啲人攞住罐冰啤酒，懶洋洋咁坐喺岸邊睇住藍色嘅海，或者同朋友一齊喺海邊燒烤。我漸漸開始習慣呢種生活——坐喺岸邊遠眺大海，唔一定要落水，反而覺得非常滿足。

喺石垣島生活嘅日子裡，我發現咗幾個欣賞海景嘅完美地點，以下係我最鍾意嘅幾個：

• 白保海岸（Shiraho Beach） – 呢度可以近距離欣賞珊瑚礁。白保海岸旁邊仲有一間世界自然基金會嘅珊瑚礁保護研究中心，致力保護呢啲獨特嘅海洋生態系統。呢度非常寧靜，係度過一個悠閒下午嘅好地方。

• 南之濱町綠地公園（Minami no Hama Park） – 一個非常適合同朋友一齊燒烤、夜晚睇星星、放風箏或者簡單享受啤酒嘅地方。呢度仲有好多貓，當地人甚至會稱佢為「貓之島」。

• 真榮里海灘（Maesato Beach） – 如果你想一邊飲啤酒一邊游水，呢個海灘係一個理想之選，而且呢度被認為係比較安全嘅游泳地點。

• 舟藏公園（Funakura Park） – 我個人非常鍾意呢個地方。我經常踩單車嚟呢度，帶本書，喺海邊坐幾個鐘，一路睇書一路飲啤酒。

石垣島仲有好多隱秘嘅景點，未來或許我會同大家分享我發現嘅「秘密基地」。我嘅第一個沖繩之夏其實好簡單：每一日放工之後，我都會去大海邊發吓呆，咁樣就Hea咗一日。