《石垣島首位香港地勤：沖繩偏遠小島奮鬥記》第十二章：混亂的九月與命運的轉捩點——2018年9月

2018年9月，對我而言係一個極度混亂又沮喪嘅月份。

嗰段時間，地勤公司嘅老細竟然請咗一位從大阪過嚟、右手有殘疾嘅巴基斯坦人做station manager。據我所知，呢位仁兄喺大阪某地勤代理公司工作唔夠一年，經驗唔深，但就因為佢係殘疾人士，公司如果聘請佢就可以攞到一筆政府津貼。於是，就係咁樣，一個完全唔熟識石垣島地勤流程嘅外籍管理層，就咁降落喺我哋嘅團隊入面。

同一時間，更令我失望嘅係——我之前嚟石垣島之前，派遣公司嘅老細曾經喺LINE答應過會幫我申請工作簽證。當時我仲存咗對話截圖，出示俾佢睇，佢卻無言以對，只係輕輕講咗句：「我會再諗諗。」之後就開始閃避我，改派其他職員同我溝通，自己完全唔再出面。

而我一直以來嘅mentor——石井小姐，亦決定喺9月底辭職。原因係佢長期一個人頂曬所有工作，而地勤公司嘅老細又極度推卸責任，成日「上層交代」咁樣咩都推落佢身上。石井小姐走之後，仲有五位同佢一齊工作嘅職員亦一齊辭職，因為大家都覺得再咁做落去根本無前景，亦接受唔到呢位上司嘅處事方式。

短短一個月內，整個石垣地勤團隊變得七零八落，而新嚟嗰位巴基斯坦station manager每日都出錯、每日都搵藉口，事後仲有超長事後檢討。作為前線員工嘅我，不單止要應付混亂嘅工作現場，內心更加焦急——因為我嘅working holiday簽證仲有半年就到期，如果搵唔到公司肯幫我申請工作簽證，我喺日本嘅生活就要告一段落。

唯一嘅希望，就係如果呢位station manager唔通過三個月試用期、被公司辭退，我就有可能被升做正職。畢竟，儘管我喺石垣工作只有半年，但石井小姐同其他資深同事都已經走晒，而其他新入職嘅員工全部做咗一個月都未夠，喺經驗上，我已經算係最熟悉操作嘅人。

嗰位巴基斯坦人仲開口話，如果我可以協助佢搞好航班運作，佢會向公司推薦我做assistant manager，但我信唔過佢。另一方面，石井小姐亦同我講，如果我有辦法令佢離職，佢願意暫時返嚟幫我，再撐半年，訓練我成為真正可以獨當一面嘅supervisor。

嗰段時間真係亂到一個點。我每日工作完都成身疲累，唔知自己將來會點。某個黃昏，我一個人坐喺宮良海邊發呆，望住一望無際嘅海，思考住自己未來嘅出路。就喺嗰一刻，有位女人帶住隻狗行過我面前——佢就係Keiko。

我記得佢喺「牛診所」工作，夏天時我哋曾經同一班朋友一齊食過飯。佢住喺我屋企附近，偶爾都會喺街見到佢散步。當時，我無諗過，呢位女性，會喺之後，徹底改變我嘅人生。

敬請期待——我喺石垣島最重要、最戲劇性嘅人生轉捩點，即將展開。