《石垣島首位香港地勤：沖繩偏遠小島奮鬥記》第十三章：Keiko的出現

2018年9月，喺混亂嘅職場同前途未卜嘅不安之中，我遇見咗一位將會徹底改變我人生嘅女性——Keiko。

其實，我第一次見佢係2018年4月。當時一位喺石垣島住咗十年嘅香港朋友揪埋大家去食飯，順便介紹咗Keiko俾我識。佢住喺宮良（Miyara），同我屋企好近，所以之後偶爾都會喺街上遇到。

Keiko喺「牛診所」工作，職業係牛の人工授精師。呢個工種聽落有啲陌生，但對石垣島嚟講卻係極度重要。人工授精師主要負責為牛隻進行人工授精，幫助血統改良、提升繁殖成功率。石垣島係沖繩最重要嘅畜牧地區之一，亦因石垣牛（Ishigaki Beef）而聞名。

石垣牛小知識

「石垣牛」屬於日本黑毛和牛系統，最大特色係油花分布均勻、肉質柔嫩。好多遊客去石垣島，都會專程嚟食一客燒肉。

但要培育出高品質嘅石垣牛，其實背後涉及大量專業工作，包括飼養管理、血統選擇同人工授精。像Keiko咁嘅人工授精師，就係默默喺第一線，確保牛群能夠持續繁衍，令「石垣牛」品牌得以延續。

當時我仲住喺Chapter 3曾提過嘅share house，同日本人Jun君一齊。最大問題係，Jun君成日幾日都唔洗澡，間屋焗促又有怪味。我好多時真係頂唔順，寧願走去Keiko屋企。

Keiko一個人同隻狗住，屋企乾淨舒適。每次散步返嚟，佢會煮多咗餸，笑住同我講：「你唔介意嘅話，過嚟食埋啦。」就係咁，我開始習慣咗晚晚走去佢屋企，一齊煮飯、一齊睇電視。

有時睇到太夜，電視仲播住綜藝節目，我哋兩個就咁靜靜坐喺沙發。窗外傳嚟夏夜嘅蟲鳴，屋內得冷氣同電視聲。嗰刻，我突然感覺到，兩個人嘅距離，已經唔止係朋友咁簡單。

幾次深夜傾偈之後，佢會提議：「太夜啦，你唔好返去啦，留低啦。」我冇再拒絕。第二朝醒嚟，望住窗外嘅藍天同陽光，感覺到一份好久未有過嘅親密同歸屬感。

去到2018年9月，我哋正式拍拖。踏入10月，我差唔多每星期有兩三晚喺Keiko屋企食飯。關係逐步加深，去到12月，我哋一齊搬去市區新屋展開共同生活。

敬請期待——下一章，我會分享我同Keiko喺拍拖半年內就決定結婚，當中經歷嘅趣事。

Continues…