《石垣島首位香港地勤：沖繩偏遠小島奮鬥記》第三章：同「隱蔽族」高達迷一齊住嘅日子——2018年4月

我被安排住喺宮良嘅一間獨立屋，搭巴士去我上班嘅機場只係10分鐘車程。本來諗住可以一個人住，但現實係我要同兩個室友一齊Share間屋。四月頭我係第一個搬入去嘅，過咗一個禮拜，來自北海道嘅19歲男仔純君（Jun）搬入嚟，住其中一個房間。講真，純君有啲似《多啦A夢》——圓碌碌。

純君性格隨和，對人好有禮貌，一見到佢個房間就知佢係高達迷，成架床頭櫃都擺滿高達模型。但同純君一齊住都有少少……挑戰，因為佢係唔沖涼嘅！佢只係用濕紙巾或者毛巾抹抹身。過咗兩個禮拜之後，啲味道開始浮現喇，而沖繩夏天又焗又熱，實在非常之臭。為咗掩蓋啲氣味，純君去返工仲會著住件外套，但其實無乜幫助。

純君喺機場都返工，佢做行李安檢員，佢嘅工作站就係我做check-in櫃位隔離，所以我哋成日見到對方。純君做嘢時好認真，但行近少少就會聞到佢浸味道。返到屋企，佢就會即刻鎖喺房入面，繼續砌高達、打機，仲成日飲可樂，基本上工作要出街外，會留喺間房度飲可樂和砌高達。

去到四月第三個禮拜，另一個室友福先生（Fuku-san）搬入嚟。佢42歲，啱啱離婚，嚟石垣島做Ramp staff。好似我同純君一樣，福先生完全無地勤經驗，係由我哋嘅派遣公司派嚟嘅。福先生喺衛生方面同純君完全相反——佢非常注重清潔，好敏感人哋點睇佢，對人哋不滿又唔會直接講出聲，簡單啲嚟講係一個好sensitive 嘅人。

喺一齊住嘅日子入面，我慢慢發現一樣奇怪嘅嘢。福先生話，我哋嗰間派遣公司「S公司」好似特別鍾意請「隱蔽族」（hikikomori）——即係成日鎖埋自己唔出門見人嘅人。呢班「隱蔽族」往往可以幾個月甚至幾年都唔出屋企，完全同社會隔離。據講，S公司已經派咗15個前隱蔽族去石垣工作。

一方面，我覺得呢個安排係好事，等佢哋可以透過全職工作重新融入社會。但係，佢哋通常要離開自己嘅Hometown，經常換工種，對發展事業嚟講未必係好事。之後我當時嘅沖繩女朋友同我解釋，呢啲公司鍾意請隱蔽族，因為佢哋對公司嘅依賴性高，所以更加容易send去唔同地方工作。

對於呢種安排，我無一個定論，但回想起嚟，呢段經歷對我嚟講係好特別。與日本室友一齊住嘅日子，令我體會到好多日本文化同社會關係嘅細節。雖然有時味道真係好難頂。

以下喺Miyara 同「隱蔽族」高達迷住嘅第一間屋。